Thursday, March 28, 2024
HomeTjeraKulturaLouis Vuitton: Çanta me flamurin shqiptar nuk u krijua nga ne

Louis Vuitton: Çanta me flamurin shqiptar nuk u krijua nga ne

Në fillim të janarit 2023, kryeministri Rama bëri një postim që preku ndjenjat patriotike të të gjithë shqiptarëve, kur shpërndau foton e çantës me flamurin shqiptar, duke e servirur si prodhimin më të ri nga shtëpia prestigjoze e modës Louis Vuitton. Por përgjigjja që Faktoje mori pas një komunikimi me Louis Vuitton përgënjeshtron pretendimin e kryeministrit, i cili njihet tashmë për propagandimin përmes dizinformimit.

Në 7 janar 2023, kryeministri Edi Rama postoi në Facebook një çantë me motive të flamurit kombëtar shqiptar, me përshkrimin “Çanta e re e shtëpisë së madhe të modës Louis Vuitton”.

Postimi në Facebook i kryeministrit Rama

Ky postim i kryeminisrit, në ditët e para të janarit, u bë virale dhe u ripostua jo vetëm nga portalet, por edhe nga shumë ndjekës.

Për të verifikuar këtë pretendim, “Faktoje” iu drejtua me anë të postës elektronike shtëpisë së modës Louis Vuitton më 10 janar.

Në përgjigjen zyrtare, më 13 janar, një përfaqësuese e Louis Vuitton i shkruajti Faktojes duke saktësuar se “krijimi është nga një palë e pavarur dhe nuk është pjesë e katalogut” të tyre.

Përgjigjia e Louis Vuitton

“Ju lutem jini të informuar se produktet tona shiten ekskluzivisht në dyqanet Louis Vuitton, që janë në pronësi dhe me staf të Louis Vuitton, si dhe përmes faqes zyrtare online të Louis Vuitton. Blerja me anë të këtij rrjeti shpërndarës ekskluziv është mënyra e vetme që klientët të sigurohen se produkti i tyre është autentik. Ne nuk mund të komentojmë mbi apo garantojmë autenticitetin e produkteve të blera tjetërkund,” shpjegon më tej përgjigjia e shtëpisë së modës.

Një kërkim pak më i thelluar mbi këtë dizajn, zbulon se ai ekziston prej së paku 4 vitesh.

Në fakt, ajo ishte pjesë e një koleksioni të limituar të vitit 2018 nga marka JAY AHR e stilistit Jonathan Riss, që përfshin thuajse 130 flamuj nga shtete të ndryshme të botës. Çantat e këtij koleksioni janë çanta vintazh Louis Vuitton, të ripërdorura nga Jay Ahr.

Kështu, çanta e dizenjuar me flamurin shqiptarnë fjalë nuk është e re, ajo ka ekzistuar që në vitin 2018. Për më tepër, ajo nuk është hedhur në treg dhe nuk mban autorësinë e shtëpisë së modës Louis Vuitton, por është një ripunim i firmës JAY AHR mbi një çantë klasike LV.

Kjo nuk është hera e parë që kryeministri Rama bëhet përçues i keqinformimit.

Në 16 shtator 2022 Faktoje përgënjeshtroi pretendimin se Zvicra do të dënonte qytetarët e saj me burg për ata që ngrohin më shumë se 19 gradë shtëpinë e tyre, siç deklaroi Rama në 8 shtator, dhe Ministrja e Energjisë Belinda Balluku në 14 shtator. Një ditë pas botimit të këtij artikulli, Rama kërkoi ndjesë që kishte “rënë viktimë e një informacioni jo të plotë dhe të saktë”.

Në 14 tetor 2021 Faktoje publikoi një artikull mbi deklaratën e kryeministrit Rama se Britania kishte bërë një plan për kufizimin e energjisë. Por një përgjigje nga qeveria britanike për Faktojen e rrëzonte këtë pretendim.

Në 29 shtator 2021 një tjetër artikull i Faktoje, ku përfshiheshin edhe  përgjigjet nga qeveria gjermane rrëzoi një tjetër pretendim të kryeministrit në lidhje me agjencinë e mediave si një model i suksesshëm gjerman.

Në 21 mars të 2020 Faktoje verifikoi një video të shpërndarë nga kryeministri Rama duke  iu referuar si ndërhyrje e policisë spanjolle për të shpërndarë njerëzit gjatë pandemisë. Videoja i përkiste zhvillimeve në Alegjeri dhe nuk kishte asnjë lidhje me pandeminë./Faktoje.al

RELATED ARTICLES
- Advertisment -

Most Popular

Recent Comments