Presidenti i SHBA-së, Donald Trump, i është përgjigjur ashpër presidentit francez, Emmanuel Macron, i cili refuzoi t’i bashkohej Komitetit të Paqes në Gaza.
Presidenti francez nuk priti gjatë për përgjigjen e Trumpit, i cili të hënën tha se Macron së shpejti do të humbasë pushtetin.
“A e tha ai këtë? Epo, askush nuk e do atë sepse ai do ta humbasë pushtetin shumë shpejt, kështu që është në rregull”, tha Trump në përgjigje ndaj vendimit të Macron.
Trump shtoi se në këtë rast, “nëse ata ndihen si Fidel Castro”, ai do të përgjigjej me një tarifë prej 200 për qind për verërat dhe shampanjat franceze.
“Ai do të bashkohet gjithashtu, por nuk është i detyruar të bashkohet. Nëse e ka thënë këtë, ndoshta e ka menduar pak më ndryshe, por nëse e ka thënë vërtet këtë, siç e dini, ai është në pushtet edhe për disa muaj të tjerë”, shtoi Trump.
Zgjedhjet presidenciale franceze janë planifikuar për në prill 2027, prandaj arsyeja për “humbjen e pushtetit nga Macron” nuk është e qartë, megjithatë zgjedhjet lokale në Francë janë planifikuar për këtë vit, për të cilat mund të ketë aluduar Trumpi.
Duke iu përgjigjur pyetjeve të gazetarëve, Trump shtoi se e kishte ftuar Presidentin rus Vladimir Putin të ishte anëtar i Komitetit të Paqes, duke thënë se ai është një lider botëror.
Trump ka dërguar ftesa në të gjithë botën, por shumica e udhëheqësve nuk janë përgjigjur ende.
Vendimi i Macronit ka shumë të ngjarë të jetë marrë, ndër të tjera, për shkak të konfliktit midis vendeve evropiane dhe Trumpit në lidhje me Grenlandën, të cilën presidenti amerikan dëshiron ta aneksojë nga Danimarka.
