Presidentja Vjosa Osmani i ka dhënë përkrahje protestës së 17 tetorit në Tiranë e cila kërkon drejtësi për ish-krerët e Ushtrisë Çlirimtare të Kosovës të cilët po gjykohen në Gjykatën Speciale në Hagë.
Osmani tha se e mbështet këtë protestë, sikurse çdo tubim tjetër që thërret për drejtësi.
Në një deklaratë për media pas vizitës në Klinikën e Onkologjisë në QKUK, shefja e shtetit u shpreh se lufta e UÇK-së ka qenë e drejtë dhe çlirimtare.
“E mbështes këtë protestë, e kam mbështetur secilën protestë që thërret për drejtësi. Qytetarët e Kosovës nuk kanë kërkuar kurrë asgjë tjetër, përpos thirrjet për drejtësi. Lufta e UÇK-së ka qenë luftë e drejtë për liri, luftë që ka pasur në fokus mbrojtjen e pragut të shtëpisë dhe qytetarëve të pafajshëm të cilët masakroheshin nga ushtria serbe”, tha ajo.
Protesta gjithëpopullore që do të mbahet në Tiranë më 17 tetor është thirrur nga shoqatat e veteranëve të luftës së Kosovës.
Protesta nuk është politike, është kombëtare.
