Në Qendrat Komunale të Numërimit (QKN) po vazhdon edhe sot procesi i numërimit të votave të kandidatëve për deputetë, si dhe verifikimi i rezultateve të subjekteve politike nga formularët e plotësuar në vendvotime pas numërimit të fletëvotimeve.
Komisioni Qendror i Zgjedhjeve (KQZ) ka njoftuar se procesi po zhvillohet me transparencë të plotë dhe nën monitorimin e vazhdueshëm të vëzhguesve të akredituar.
Sipas njoftimit të KQZ-së, verifikimi i rezultateve të subjekteve politike dhe numërimi i votave të kandidatëve për deputetë është përmbyllur në nëntë komuna.
Deri të mërkurën në mëngjes, procesi është përfunduar në 1 mijë e 763 kuti votimi, që përbën 68.95 për qind të gjithsej 2 mijë e 557 kutive të votimit në nivel vendi.
KQZ bën të ditur se pas përfundimit të numërimit për secilin vendvotim, të dhënat po transmetohen menjëherë në platformën zyrtare të rezultateve.
